Siglir tar il cuntegn

Header

cuntegn

Exteriur «Solar Impulse 2» sa tschenta ad Abu Dhabi

Il viadi enturn il mund è gartegià: Suenter 17 etappas u passa 43'000 kilometers arriva Bertrand Piccard al punct da partenza en l'emirat.

L'aviun svizzer è arrivà mardi a bun’ura en ses lieu da destinaziun Abu Dhabi. Ed uschia ha per l'emprima giada in aviun circumdà il mund senza carburant e mo cun energia solara.

La davosa etappa da Cairo ad Abu Dhabi ha il pilot Bertrand Piccard fatg en var 48 uras. Dapi la partenza il mars 2015 ad Abu Dhabi han Piccard e ses collega André Borschberg fatg pli che 43’000 kilometers cun l’aviun «Solar Impulse 2».

Bertrand Piccard aveva stuì spustar la partenza per la davosa etappa pervi dad ina grippa e pervi da schlett’aura per in’emna. La davosa saja er stada la pli difficila da las totalmain 17 etappas. Quai ha communitgà la squadra da «Solar Impulse 2». La raschun sajan stadas cunzunt las diversas zonas cun scumond da sursgular e l’aura.

Doris Leuthard al lieu

Tar ils giasts uffizials ch’han spetgà l’arriva da l’aviun ad en l’emirat han tranter auter er tutgà la cussegliera federala Doris Leuthard, prinzi Albert da Monaco ed il minister dal stadi Al Jaber ch’è il manader da la suprastanza da la citad ecologica Masdar.

RR novitads 06:00

Artitgels legids il pli savens