Siglir tar il cuntegn

Header

Navigaziun

Liviu Dragnea, il schef da la partida socialdemocratica da la Rumenia (PSD).
Legenda: Liviu Dragnea, il schef da la partida socialdemocratica da la Rumenia (PSD). Keystone
cuntegn

Exteriur Socialdemocrats en Rumenia pon quintar cun maioritad

Il prechastià schef da la PSD, Liviu Dragnea, ha survegnì 47% da las vuschs. Schebain el daventa schef da la regenza rumena è anc intschert.

En la Rumenia han ils Socialdemocrats (PSD) gudagnà l’elecziun parlamentara da la dumengia. Ella cuntanscha 47% da las vuschs, ha communitgà il biro electoral a Bukarest suenter che dus terzs da las vuschs eran dumbradas. Tras la repartiziun da las vuschs restantas po la PSD survegnir la maioritad absoluta da sezs en il parlament.

Giuvna partida procura per surpraisa

Sin plaz 2 suonda la partida PNL mez-dretga cun radund 20% da las vuschs. Per ina surpraisa ha procurà la partida eco-liberala USR ch’è pir vegnida fundada avant in mez onn: Ella cuntanscha 7,5% da las vuschs en la chasa da represchentants e 7,6% en il senat. Uschia pudess la USR daventar la terz ferma forza da la Rumenia, gist avant la partida UDMR.

Schef da PSD è prechastià

Fin uss èsi nuncler sch’il schef da la PSD, Liviu Dragnea, daventa primminister. El è numnadamain prechastià pervi da manipulaziun d’elecziuns. Il president da stadi Klaus Iohannis aveva declerà ch’el na dettia betg l’incarica da furmar ina nova regenza ad in politicher cun problems giuridics.

Dragnea da sia vart ha dà da chapir ch’el vegnia ad insister sin sia nominaziun. A medem mument ha el refusà speculaziuns che l’anteriur politicher da la PSD Vasile Dincu saja en discurs sco candidat da reserva.

RR novitads 06:00