Siglir tar il cuntegn

Exteriur Smog fraina traffic a Roma e Milaun

Suenter la citad da Milaun vala er per Roma in scumond da charrar ils dis suenter Nadal. Quai pervi da valurs da smog memia autas en omaduas citads talianas.

La skyline da Roma durant la stad 2003: Ils 26 da zercladur da lez onn era il traffic vegnì limità pervi dal smog.
Legenda: La skyline da Roma durant la stad 2003: Ils 26 da zercladur da lez onn era il traffic vegnì limità pervi dal smog. Keystone

Ils 28 e 29 da december na dastgan nagins autos e camiuns charrar tras il center da la chapitala durant il di tranter la 10:00 e las 16:00. Quai haja decis il cumissari da Roma, Francesco Paolo Tronca, sco l'agentura da novitads ANSA rapporta.

Smog a Milano il schaner 2010.
Legenda: Smog a Milaun n’è betg insatge nov, qua in’impressiun dal schaner 2010. Keystone

Milaun ha pli lung scumond

A partir da glindesdi ils 28 da december fin mesemna ils 30 da december na dastgan nagins vehichels esser sin via, tranter las 10:00 l'avantmezdi ed il suentermezdi da las 16:00. Quai han annunzià las autoritads. Per animar ils vischins da far diever dapli dal traffic public, han las autoritads introducì bigliets spezials pli bunmartgads.

L’Italia dal Nord patescha il pli fitg da cundiziuns meteorologicas che chaschunan smog. En parts da la regiun n’hai dapi dus mais betg pluvì.

RR Novitads 06:00 / 16:00