Slovachia na vul betg prender si fugitivs muslims

Tenor il primminister Robert Fico è quai la reacziun sin las violaziuns succedidas avant paucs dis a Cologna ed a Hamburg.

robert fico

Legenda da maletgs: Il primminister slovac Robert Fico na vul nagins fugitivs muslims. Keystone

Plinavant na vegnia il pajais betg mo a cumbatter quotas da fugitivs liantas, mabain er impedir ch'i possia insumma sa furmar ina cuminanza muslima isolada en il pajais. Ultra da quai na vegnia la Slovachia betg pli a far part ad acziuns umanitaras per fugitivs, mabain impunder sias contribuziun mo anc per la protecziun dals cunfins, uschia Robert Fico vinavant.

L'onn passà han 169 persunas dumandà asil en la Slovachia. Da quai èn la finala 8 vegnidas prendidas si.

Mulestas sexualas da Silvester a Cologna

La notg da Silvester aveva ina gruppa dad umens mulestà pliras dunnas a la staziun principala. Els hajan mulestà sexualmain ed engulà rauba. Perditgas ed unfrendas han inditgà che quai saja stà per la gronda part umens d'origin nord-african ubain arabic.

Entant ha quai dà 121 denunzias penalas pervi da mulesta sexuala a la staziun da Cologna. 50 dunnas hajan inditgà ch'i saja vegnì engulà. 2 dunnas sajan vegnidas violadas. Era a Hamburg ha la polizia registrà pliras denunzias e mulestas.

RR novitads 06:00