Situaziun umanitara en Siria pli e pli precara

L'ultim agid umanitar haja cuntanschì la citad Madaja l'october passà, ha ditg ina pledadra dal Program alimentar mundial.

Cuschina demolida en ina chasada a Madaja

Legenda da maletgs: A Madaja regia fom e miseria Keystone

Er medias localas ed activists rapportan da cundiziuns catastrofalas en la citad Madaja, en il vest da la Siria. Il mument vivian 40'000 persunas en la citad. Da quellas sajan radund la mesadad civilists. Senza agid saja il privel grond che bleras persunas ch'èn serradas en a Madaja morian da la fom. Gia ussa curseschan fotografias ord la citad che mussan persunas smagregiadas enfin sin l'ossa.

In medi da la citad ha rapportà a l'agentura da novitads tudestga DPA che la glieud haja cumenzà a mangiar pastg per dustar in zic la fom. Las indicaziuns dal medi n'èn betg confermadas d'in post independent.

Tenor il post d'observaziun sirian per ils dretgs umans occupeschan las truppas dal reschim e da la milissa Hisbollah la citad Madaja dapi 170 dis. Camiuns cun rauba d'agid sajan pronts, n'hajan dentant nagin access.