- Tar las elecziuns da parlament en l'Israel sa mussa ina situaziun da pat tranter il primminister Benjamin Netanjahu e l'anteriur schef da l'armada Benny Gantz.
- Tenor la segunda elecziun vegn la partida «Likud» dal primminister Benjamin Netanjahu sin 31 fin 33 mandats.
- L’allianza dal center sanester da Benny Gantz vegn sin 32 fin 34 mandats.
- Gantz era suenter l'elecziun per ina coaliziun, Netanjahu per ina «ferma regenza».
Uschia pudessi puspè vegnir grev da furmar ina regenza. Pertge latiers dovri ina maioritad absoluta da 61 sezs. Quels na cuntanschan, sco i vesa il mument ora, ni las partidas da la dretga communablamain, ni quellas dal center sanester. Radund 6,4 milliuns persunas cun il dretg d’eleger èn stadas clamadas a las urnas per eleger ils 120 commembers da la Knesset.
L’ultima elecziun ch’è stada la primavaira ha Netanjahu gudagnà. Silsuenter n’èri però betg gartegià ad el da furmar ina nova regenza. Il resultat final vegn spetgà l’entschatta da l’autra emna.
Ord l'archiv
Dapli infurmaziuns davart l'Israel: Ils 14 da matg 1948 è l'Israel vegnì fundà. Il conflict tranter ils Israelians ed ils Palestinais è dapi la fundaziun adina stà in tema brisant.
RR novitads 06:00
