Siglir tar il cuntegn
cuntegn

Exteriur Siria: USA e Russia fan giu reglas per evitar malchapientschas

Ils Stadis Unids da l’America e la Russia han fatg giu co els vulan evitar malchapientschas durant lur engaschi militar en la Siria. Ils discurs stads sajan stads «professiunals ed amiaivels», uschia in pledader a Washington.

Il minister da l’exteriur american John Kerry e ses collega d’uffizi russ Sergej Lawrow.
Legenda: Il minister da l’exteriur american John Kerry e ses collega d’uffizi russ Sergej Lawrow. Reuters

Tar il discurs da bun in’ura sajan ins sa cunvegnids ch’ins sa tegnia vi da las reglas internaziunalas e ch’ins dovria ils chanals da communicaziun usitads, communitgescha la regenza americana. Ch’ils dus servetschs secrets barattan dentant era datas, na saja betg planisà.

USA crititgescha Russia

Quai na muntia dentant betg ch’ils Stadis Unids da l’America tolereschia quai che la Russia haja fatg. Il vest aveva rinfatschà a la Russia la mesemna che ses militar haja era bumbardà forzas moderadas e civilists en la Siria. La Russia refusa la critica sco nungiustifitgada.

Al-Assad duai vegnir integrà en ils discurs

La Russia ha entant, sco annunzià, preschentà en il cussegl da segirtad da las Naziuns Unidas ina resoluziun per il cumbat cunter la milissa da terrur Stadi islamic. Sco diplomats da l’ONU han confermà, prevesa la resoluziun ch’era il president sirian, Baschar al-Aassad, vegnia integrà en ils discurs. Anc intschert è sche la Russia vegn era a sa participar a las attatgas sin la milissa da terrur Stadi islamic en l’Irac.

Russia sustegna proposta Svizra

Pli franc è perencunter ch’era la Russia sustegna la proposta da Cusseglier federal Didier Burkhalter da furmar ina gruppa da contact per instradar in process da pasch en Siria. Quai almain tenor Burkhalter ch’ha discurrì cun il ministers da l'exteriur russ e ses collega d’uffizi american. Part da la gruppa duai far la Russia, ils Stadis Unids da l’America, sco era l’Iran e l’Arabia Saudita. Er cun il president sirian Baschar al-Assad vul Burkhalter discurrer.