Siglir tar il cuntegn
Inhalt

Exteriur Siria: Success per rebels ad Aleppo

Pliras gruppas da rebels han tenor atgnas indicaziuns rut la bloccada che las truppas da la regenza avevan construì enturn la metropola siriana. Quai suenter grevs cumbats.

Panzer.
Legenda: Rebels paran d'avair rut la bloccada enturn la citad Aleppo. Reuters

Ils rebels sajan s’avanzads en il sidvest dad Aleppo e sa sajan colliads cun truppas ch’eran fin uss circumdadas, sco in pledader dals rebels ha ditg. Quai ha er confermà il post d’observaziun sirian per ils dretgs umans cun sedia a Londra. Dentant na dettia anc nagin corridor segir en ils quartiers occupads.

Almain 630 morts entaifer in'emna

Dals cumbats per l’anteriura metropola economica Aleppo èn entaifer in’emna passa 500 cumbattants morts sin omaduas varts. Ultra da quai sajan almain 130 civilists morts. Quai rapporta il post d’observaziun sirian per ils dretgs umans. Attatgas ord l’aria da las truppas da regenza hajan chaschunà las bleras unfrendas. Ils rebels na possedian nagins aviuns da cumbat.

En l’ost dad Aleppo èn radund 250'000 persunas bloccadas. La cuminanza internaziunala pretenda dal reschim dal president Baschar al-Assad da terminar questa bloccada. Organisaziuns d’agid averteschan dapi dis dad ina catastrofa umanitara ad Aleppo.

RR novitads 20:00