Siglir tar il cuntegn
Inhalt

Exteriur Siria: Offensiva cunter la citad Rakka, l'ultim center dal SI

En la Siria hajas cumenzà l'offensiva decisiva per stgatschar la milissa da terror Stadi Islamic SI or da la citad Rakka. Rakka è la citad pli impurtanta per il SI, proclamada dad el sco chapitala da ses uschenumnà califat. L'offensiva decisiva vegn communitgada da l’allianza da rebels.

In camiun plain rauba e persunas.
Legenda: Fugia grategiada – 200'000 persunas èn rivadas da partir enfin uss da Rakka (purtret dals 14 da mai 2017). Keystone

L'allianza da rebels sustegnida dals Stadis Unids haja attatgà ord l'aria in quartier en l'ost da la citad da Rakka rapporta il post d'observaziun per dretgs umans che stà datiers a l’opposiziun.

SI dà tut per defender sia chapitala

I vegnia a dar in cumbat vehement, han communitgà ils rebels. Ils miliziunaris dal SI «vegnian a murir per defender lur uschenumnada chapitala». Il SI aveva proclamà Rakka sco chapitala da lur stadi. Tenor l’allianza dals rebels saja reuschi a var 200’000 persunas da fugir da Rakka.

Cumbats per Rakka dapi onns

Suenter la re-conquista da Mossul vala Rakka sco la pli impurtanta citad ch'è anc en ils mauns dal Stadi Islamic. Il SI aveva conquistà la citad dal 2014 dals rebels. Ils cumbats per Rakka duran dapi il november da l'onn passà.

RR novitads 11:00