Siglir tar il cuntegn
Inhalt

Exteriur Sicilia: 15 persunas arrestadas pervi d'incendis

Tar las 15 persunas sa tracti da pumpiers voluntaris. Els vegnan suspectads d'avair mess intenziunadamain fieu.

Purtret d'in vitg en Sicilia ed in fieu che arda dasperas.
Legenda: En Sicilia hai dà las ultimas emnas adina puspè incendis da guaud. Keystone

Sin la Sicilia èn 15 commembers dals pumpiers voluntaris vegnids arrestads. Sco la polizia communitgescha vegnan els suspectads d'avair dà fieu e d'avair cugliunà il stadi. La gruppa duai avair simulà alarms per pudair gudagnar daners cun ir a stizzar. Els vegnan pajads 10 euros l'ura. Las arrestaziuns èn stadas en il sid da l'insla. Là hai dà las davosas emnas plirs grevs incendis.

Malgrà las painas fitg severas da quatter enfin 10 onns praschun, vegnan mess blers fieus ord motivs speculativs per bajegiar. Sur tut en il sid da l'Italia veglian ins uschia sfurzar il stadi dad emplantar, uschia experts. Per emplantar vegnian duvradas persunas da la regiun senza lavur.

En blers lieus da l'Italia dal sid giascha la dischoccupaziun tar passa 25%. Mintga segund giuvenil è senza lavur.

RR novitads 12:00