Siglir tar il cuntegn
cuntegn

Exteriur «Shutdown» en Stadis Unids da l'America

En ils Stadis Unids è ì en vigur da mesanotg temp local in uschenumnà «Shutdown». Il senat n'è betg sa cunvegnì sin in preventiv transitoric. Uschia è er la participaziun da Donald Trump al WEF malsegira.

Ura mussa mesanotg.
Legenda: Da mesanotg temp local è il «Shutdown» ì en vigur. Keystone

Curt e concis

  • Cunquai ch'il senat n'ha betg acceptà il preventiv provisoric èsi en ils Stadis Unids vegnì tar in «Shutdown».
  • Blers servetschs public ston uschia metter en il manaschi.
  • Er la participaziun dal president american Donald Trump e malsegira.

La regenza federala dals Stadis Unids haja cuntanschì la limita maximala da daivets. Uschia stoppian servetschs publics sco uffizis, museums, zoos ed era parcs naziunals serrar ni porscher in servetsch limità. Il militar, la polizia ed il servetsch secret na stoppian betg reducir lur lavur.

Senat n'accepta betg preventiv transitoric

I na dat nagin cumpromiss enfin tar la deadline da la sis la damaun: La votaziun davart il preventiv transitoric ha fatg naufragi en il senat. Il senat saja da l'avis ch'ils custs dal militar sajan memia auts. Plinavant vulan ils democrats che president Trump empermettia da sustegnair 700'000 immigrants ch'èn vegnids sco uffants illegalmain en il pajais. Il senat tschertga vinavant ina schliaziun – almain per las proximas trais emnas.

Trump pudess tuttina vegnir al WEF

Era tar ina stretga finanziala da la regenza pudess il president american Donald Trump teoretic vegnir al Forum d'economia mundial, uschia collavuraturs da la regenza. Quai tutgia tar ils pensums constituziunals d'in president. Sco quai che SRF scriva sin sia pagina d'internet n'han ils organisaturs dal Forum mundial d'economia nagina conferma sche Trump vegn a Tavau. Ins sa stentia per infurmaziuns, uschia hai num.

Il davos president american, Barack Obama, aveva ditg giu tar il davos «Shutdown» in viadi en l'Asia.

RR novitads 06:00