Damai che blers aviuns restian il mument per terra, saja grev da transportar material da tests da corona e material da protecziun per medis là nua che quei vegnia duvrà urgentamain. Perquai pretenda l'Organisaziun mundiala da la sanadad WHO punts aviaticas.
La WHO haja tramess 1,5 milliuns tests a pajais che dovrian quels, ha ditg il coordinatur per l’agid d’urgenza da la WHO Michael Ryan. En paucas emnas dovria dentant 80 fin 100 giadas dapli tests. Mo sch’ins possia testar tut ils cas da suspect dal coronavirus, saja pussaivel da limitar il virus.
Material fiss bainprest pront
La WHO ha chattà in furnitur en la China che po bainprest furnir material da protecziun, ha ditg il schef da la WHO Tedros Adhanom Ghebreyesus. Ed el ha crititgà ils pajais che blocheschan l’export da tal material. Vitiers appellescha l’organisaziun a la glieud sauna, da desister da purtar mascas da protecziun.