Siglir tar il cuntegn

Header

Navigaziun

Il militar ha chattà parts dal vrac e chaussas persunalas en la mar davant Alexandria.
Legenda: Il militar ha chattà parts dal vrac e chaussas persunalas en la mar davant Alexandria. Keystone
cuntegn

Exteriur Sgol MS804: En l'aviun duai avair brischà

Curt avant che l'aviun saja crudà, haja in sistem da controlla annunzià fim en ina da las tualettas ed en il local d'electronica. Quai ha confermà l'uffizi per accidents da sgol franzos, BEA. Dentant saja anc bler memia baud da trair conclusiuns grazia a questas infurmaziuns.

L’impurtant en furma concisa:

  • En l'aviun duai avair brischà cur avant ch'el saja crudà.
  • Il militar da l'Egipta annunzia d'avair chattà parts dal vrac ed objects persunals.
  • In Airbus 320 da la Egypt Air cun 66 persunas a bord era partì da Paris la gievgia a bun’ura e crudà sur la Mar Mediterrana.
  • La gievgia saira aveva la societad aviatica Egypt Air l’emprim communitgà d’avair chattà emprimas parts dal vrac da la maschina sparida, tranter auter vestas da salvament e tocca da plastic. Pli tard ha la societad puspè curregì questas indicaziuns.
  • L’Egipta suppona in act terroristic. Ils Stadis Unids stattan scepticamain visavi questa supposiziun.
  • En la Mar Mediterrana cuntinuescha la tschertga per MS804. Tras ferma plievgia vegn la tschertga probablamain impedida fermamain.
  • La regenza franzosa n’ha anc adina naginas infurmaziuns davart la crudada da l’aviun.

En la Mar Mediterrana cuntinuescha la tschertga extendida per parts dal vrac da l’aviun da passagiers d’Egypt Air. Il militar egipzian ha entant annunzià d’avair chattà emprima tocca dal vrac sco er chaussas persunalas dals passagiers. Il lieu da chat è radund 290 kilometers en il nord d’Alexandria.

Bastiments da la marina ed aviuns grecs ed egipzians tschertgan en la Mar Mediterrana vinavant per l’aviun crudà da Egypt Air. La regenza franzosa percunter spera ch’i dettia indizis per il motiv da la crudada. Quels na datti numnadamain anc adina betg.

MS804 è in Airbus 320 cun 66 persunas a bord

Sco quai che la societad aviatica «Egypt Air» rapporta sin sia preschientscha confermada sin Twitter , il link avra en ina nova fanestraè il sgol MS804 sparì dal radar sur la Mar mediterrana. I sa tractia d'in Airbus (A320) cun 66 persunas a bord: 56 passagiers e 10 commembers dal team.

RR novitads 06:00++

Ils tweets dal conto confermà da la «Egypt Air»

Midar numer da sgol

Egypt Air mida il numer da sgol per la lingia Cairo-Paris. Empè da MS804 duai la colliaziun survegnir il numer MS802, uschia infurmaziuns da l’administraziun aviatica en la chapitala egipziana. Igl è usità da midar il numer da sgols suenter ina disgrazia. Lingias da sgol na duain en il futur betg pli regurdar a disgrazias passadas.