Ils servetschs secrets europeics vulan crear en l'emprima mesadad da quest onn ina plattafurma per simplifitgar e render pli spert il barat d'infurmaziuns. Quai han il president dal Uffizi federal da defensiun da la constituziun tudestg ed il schef dal servetsch secret ollandais communitgà oz a Berlin.
La gruppa d'anti-terror CTG (Counter Terrorism Group) creescha questa plattafurma. La CTG era vegnida fundada sco consequenza da las attatgas dals 11 settember dal 2001. Ella è in'allianza informala da 30 servetschs secrets - tranter quels era il svizzer.
RR novitads 14:00