Siglir tar il cuntegn

Header

cuntegn

Exteriur Separatists en l'Ucraina han rut l'armistizi

L'Uniun Europeica rinfatscha als separatists pro-russ da rumper l'armistizi en l'Ucraina dal ost. L'agir dals separatists, sustegnids da la Russia en la citad da Debalzewe, saja ina clera violaziun da l'armistizi. Quai ha ditg la responsabla per l'exteriur da l'UE, Federica Mogherini.

Sch'ils cumbats cuntinueschian alura saja l'UE pronta per ina reacziun commensurada, uschia Mogherini. La Russia ed ils separatists stoppian realisar immediat e cumplainamain las obligaziuns ch'els haja acceptà l'emna passada a Minsk.

I saja da sa tegnair vid il ruaus da cumbat e da retrair las armas grevas. Plinavant pretenda Mogherini ch'observaders da l'OSCE hajan access immediat a la regiun enturn la citad Debalzewe.

Era la regenza tudestga sentenzia decididamain l'agir militaric dals separatists a Debalzewe. Tenor il pledader da la regenza tudestga na saja betg excludì ch'i dettia ulteriuras sancziuns cunter la Russia sch'ils cumbats tranter las truppas da la regenza ucranaisa ed ils separatists escaleschian vinavant.

RR novitads 15:00

Artitgels legids il pli savens