Siglir tar il cuntegn

Exteriur Sentenzias miaivlas a Hongkong

Pervi da lur rolla sco demonstrants pro-democratics il 2014 èn trais manaders dals students vegnids sentenziads a chastis d'arrest cundiziunads e lavur sociala.

Trais giuvens asiats bandunan la dretgira a Hongkong.
Legenda: Ils trais delinquents Joshua Wong, Nathan Law ed Alex Chow bandunan la dretgira a Hongkong ils 15 d'avust 2016 Keystone

Il giuven da 19 onns, Joshua Wong, il pli enconuschent dals manaders sto prestar 80 uras lavur sociala. Nathan Law, in da ses collavuraturs ha da prestar 120 uras da lavur sociala, Alex Chow ha survegnì in chasti d’arrest cundiziunà.

Tuts trais èn vegnids sentenziads il fanadur pervi da «radunanzas illegalas». «Jau respect la giustia ed il stadi da dretg, er sche jau na sun betg d’accord cun la sentenzia», di Wong suenter il termin d’audienza il glindesdi.

Protests paschaivels n'en nagin delict criminal.

Activists per ils dretgs umans crititgeschan il process malgrà las sentenzias miaivlas en vista al chasti maximal da tschintg onns arrest. «Cun la sentenzia dals students sa cuntegnan las autoritads a Hongkong adina dapli sco lur collegas a Peking», di Sophie Richardson da Human Rights Watch. «Protests paschaivels n’èn nagin delict criminal.»

Ils «protests da parasol»

La sentenzia va enavos sin ils «protests da parasol» dals 26 da settember 2014. Là èn ils manaders raivids sur ina saiv en la curt d’entrada da la sedia da la regenza a Tamar. Pli tard èn suandadas pliras demonstraziuns che han bloccà impurtantas parts da la metropola economica Asiata. Ils protests èn vegnids clamà en vita pervi da ina decisiun da Peking. Là èsi vegnì decidi da far il 2017 l’emprima giada ina elecziun directa a Hongkong. Ils electurs avessan dentant betg pudì nominar sezs ils candidats.

RR novitads 12:00