Siglir tar il cuntegn

Header

cuntegn

Senat ha decidì Impeachment cunter Trump è confurm a constituziun

Mardi ha cumenzà la segunda procedura d'impeachment encunter l'anteriur president Donald Trump. Ses advocats han empruvà da far valair che quai na saja betg confurm a la constituziun, damai che Trump n'è uss betg pli president. Il senat ha decidì che la procedura encunter Trump po vegnir cuntinuada.

La procedura da relaschada d'uffizi cunter l'anteriur president american Donald Trump è confurm a la constituziun er sch'el na saja betg pli en uffizi. Quai ha decidì il senat american per l'avertura da la segunda procedura d'impeachment cunter Trump cun 56 cunter 44 vuschs.

Uschia po cumenzar oz effectivamain il process da relaschada d'uffizi. Ils democrats renfatschan a Trump d'avair instigà ses aderents ad in assagl sin il capitol l'entschatta schaner. I saja inacceptabel ch'in president cutizza a violenza cunter instituziuns be perquai ch'el n'acceptia betg in resultat d'elecziun.

Nagina segunda perioda d'uffizi

Ina raschun ch'ils democrats vulan questa procedura encunter Trump è per ch'el na possia betg vegnir elegì ina segunda giada sco president. Trump ha numnadamain regì be quatter onns. En ils Stadis Unids pudess el pia anc ina giada far quatter onns sch'el vegniss elegì. Plinavant pudess el vegnir mess avant dretgira per malfatgs, sche l'impeachment grategia. Quai è dentant pauc probabel perquai ch'i duvrass ina maioritad da dus terzs en il senat e quel è dividì mez e mez tranter democrats e republicans.

audio
Per tadlar: las novitads da las 07:00
ord RTR Audio dals 10.02.2021.
laschar ir. Durada: 4 minutas 49 Secundas.

RTR novitads 06:00

Artitgels legids il pli savens