Siglir tar il cuntegn
Inhalt

Exteriur Segunda schanza per Tsipras

Il primminister da la Grezia, Alexis Tsipras, ch'era vegnì reelegì la dumengia en uffizi, è vegnì saramentà ad Athen. Anc avant aveva il president da stadi, Prokopis Pavlopoulos, incumbensà Tsipras da furmar ina nova regenza.

Alexis Tsipras giubilescha suenter la victoria en las elecziuns.
Legenda: Alexis Tsipras, il nov schef da la regenza greca. keystone

Alexis Tsipras e sia partida da la sanestra Syriza avevan gudagnà la dumengia las elecziuns parlamentaras en la Grezia, e quai cun passa 35% da las vuschs; dentant senza cuntanscher in pli absolut.

La partida conservativa Nea Dimokratia aveva survegnì enturn 28% da las vuschs. Quest resultat era bler pli cler, che quai che las prognosas avevan laschà spetgar. Tenor lezzas avessi gì da dar in resultat piz a cup.

Sco Syriza aveva communitgà, saja Tsipras gia sa cunvegnì cun ils «Grecs independents» da furmar ina coaliziun.

Il schef da la gruppa da l’euro, Jeroen Dijsselbloem, ha numnà sin Twitter il resultat da l’elecziun en la Grezia «in ferm mandat» dals electurs, per cuntinuar il curs da refurma en il pajais.

RR Novitads 06:00 / 21.09.2015, 20:00