Siglir tar il cuntegn
Inhalt

Exteriur Seehofer insista sin curs dir davart fugitivs en Germania

Il schef da la CSU e primminister da la Baviera, Horst Seehofer, vul mantegnair la direcziun en la crisa da fugitivs. El crititgescha la chanceliera Angela Merkel (CDU) e sia politica da fugitivs. Entant na vul el betg sa sparter da l’uniun da sia partida cun la CDU.

Horst Seehofer durant ses pled al di da partida da la CSU, ils 21 da november 2015.
Legenda: Horst Seehofer durant ses pled al di da partida da la CSU, ils 21 da november 2015. Keystone

Sco Seehofer ha ditg la sonda al di da partida da la CSU, na fetschia sia partida nagina «cultura da bainvegni, mabain ina cultura da raschun». Plinavant ha Seehofer fatg attent che passa in mez milliun fugitivs han passà il cunfin tudestg en Bavaria dapi il settember.

Silsuenter è Seehofer vegnì reelegì sco schef da la CSU cun 87,2% da las vuschs. Quai è il mender resultat ch’el ha cuntanschì insacura.

CSU vul limitar l’immigraziun da fugitivs

Ils stgars 800 delegads da la CSU han approvà ina moziun che pretenda ina limita naziunala dal dumber da fugitivs per il 2016. Dapi l'entschatta da quest onn ha la Germania recepì pli che 900’000 fugitivs, conferma il minister da l'intern da la Baviera Joachim Herrmann. Il venderdi aveva Angela Merkel refusà d’introducir ina limita naziunala dal dumber da fugitivs.

RR novitads 12:00