Siglir tar il cuntegn

Header

cuntegn

Exteriur Scolar ha sajettà enturn en in gimnasi en Frantscha

A Grasse en Frantscha dal sid ha in giuvenil sajettà sin pliras persunas. Dus scolars ed il manader da scola sajan vegnids blessads. La polizia ha pudì arrestar il gimnasiast.

Il gimnasiast da 17 onns ch’è vegnì arrestà a Grasse en Frantscha dal sid haja sajettà sin pliras persunas en in gimnasi. Tenor las indicaziuns da las autoritads da scola èn dus scolars ed il manader dal gimnasi vegnids blessads. Enfin ussa na dat i naginas indicaziuns per ina attatga terroristica.

Tenor la polizia era il giuvenil en possess d’ina buis, duas armas da maun e duas granatas da maun cura ch'el è vegnì arrestà. I sa tractia d’in scolar dal Lycée Alexis de Tocqueville, la medema scola nua che tut è capità. Il gimnasiast n'era betg dà en egl a la polizia pli baud. I para ch'il giuvenil haja agì sulet e na sco supponì l’emprim, cun in cumplizi.

En tut las scolas a Grasse èn vegnidas instradadas mesiras da precauziun. Ils scolars n’han betg pudì bandunar las scolas.

RR novitads 17:00

Artitgels legids il pli savens