Siglir tar il cuntegn

Exteriur Schneider Ammann ha visità la Nigeria

Durant sia visita en la Nigeria è il cusseglier federal Johann Schneider Ammann s'infurmà davart pussaivladads per rinforzar la collavuraziun economica cun il pajais.

Johann Schneider Ammann.
Legenda: Il 2017 ha la Svizra suttascrit ina cunvegna da collavurar economicamain cun la Nigeria. Keystone

La gievgia ed il venderdi ha il cusseglier federal Johann Schneider Ammann visità la Nigeria ensemen cun parlamentaris, cussegliers guvernativs e radund 20 represchentants da l'economia e da la politica. Quai per s'infurmar davart ina collavuraziun pli stretga cun il pajais che sa regenerescha actualmain da la recessiun.

Recessiun

Il 2014 ha la Nigeria patì ina recessiun pervia dals bass pretschs per ieli. Suenter set quartals negativs è l'economia il 2017 puspè creschida per 0,8%.

En la chapitala Abuja ha il minister nigerian d’industria Okechukwu Enelamah infurmà la delegaziun svizra sur da las stentas che la Nigeria impunda per surmuntar la recessiun e dar dapli schlantsch e l’economia. Cun il plan da recreaziun veglian ins cuntanscher dapli independenza da l'ieli e diversifitgar la fiera.

Ina fiera lucrativa

En il center economic da la Nigeria, a Lagos, è la delegaziun vegnida infurmada davart pussaivladads e cunfins d'ina collavuraziun tranter ils pajais. Per la Svizra saja la fiera en il pajais african cun la pli blera populaziun lucrativa. Enfin uss sajan gia radund 45 interpresas activas en la Nigeria e dettian lavur a pli che 10'000 persunas, ha la pledadra dal departament responsabel Evelyn Kobelt ditg.

La Nigeria è er il pli impurtant producent d'ieli per la Svizra. Uschia han ins il 2017 importà prest la mesadad da l'ieli da la Nigeria.

RR novitads 11:00