Schneider-Ammann accentuescha l'impurtanza d'ina sauna economia

En ses pled davant l'assamblea generala da l'ONU ha il president da la confederaziun accentuà ch'ina economia sauna dettia ina perspectivas als burgais. Plinavant saja in'economia ferma in factur impurtant en chaussa per prevegnir a violenza e terror. Ina rolla centrala hajan tenor el ils giuvens.

Johann Schneider-Ammann davos il pult dal pledader da l'ONU.

Legenda da maletgs: Il president dal Cussegl federal Johan Schneider-Amman accentuescha l'impurtonza d'ina ferma economia. Reuters

Il president da la confederaziun, Johann Schneider-Ammann haja accentuà la rolla dals giuvens en l'economia. Persunas giuvnas stoppian avair access a la furmaziun ed ins stoppia mussar ad ellas vias en il martgà da lavur. El saja persvas ch'ina economia sauna gidia da cuntanscher las finamiras da l'ONU. Las sfidas che stettian davant l'ONU sajan enormas. La situaziun actuala en il proxim orient ed en regiuns da l'Africa sajan exempels tragics.

Ina ferma ONU saja uschè impurtanta sco anc mai

Stadis, economias e societads che crodian dapart procurian per radicalisaziun. Quai plinavant procuria per terrorissem e conflicts armads. Ord quai sa resultian lura puspè blers morts e fugitivs. Las consequenzas da quai tutgian nus tuts. Ord quai motiv saja uschè impurtant sco anc mai che l'ONU saja ferma.

Ils ultims 20 onns haja l'ONU procurà che la paupradad sil mund saja sa sbassada per la mesadad. Grazia als impuls da las Naziuns Unidas saja il livel da la scolaziun e furmaziun s'auzà sin l'entir mund.

Genevra sco center global

Schneider-Ammann ha era menziunà ch'il Cussegl per dretgs umans da l'ONU haja quest onn ses dieschavel giubileum. Il Cussegl prestia in'impurtanta rolla per tgirar e proteger ils dretgs umans. Las sinergias a Genevra duain era vegnir schlargiadas tranter ils acturs là per che Genevra possia daventar center global en dumondas umanitaras.