Siglir tar il cuntegn
Inhalt

Exteriur Schliaziun diplomatica per la Mar sid-chinaisa

Tenor James Mattis, il minister da defensiun american na saja squitsch en il conflict per la Mar sid-chinaisa betg necessari. Quai ha el ditg d'ina conferenza da pressa communabla cun il minister da defensiun giapunais a Tokio. Ils problems sa laschian schliar il meglier cun diplomazia.

Purtret dals dus ministers durant la communicaziun.
Legenda: James Mattis, il minister da defensiun american e la ministra da defensiun dal Gaipun, Tomomi Inada. Keystone

Tar ina visita en il Giapun ha il chef dal pentagon da Trump ditg ch'i na dovria nagin squitsch militar pervi da la crisa en la Mar sid-chinaisa. Quai è vegnì communitgà durant ina cunferenza da pressa communabla cun la ministra da defensiun dal Giapun Tomomi Inada. I saja meglier da schliar ils problems cun diplomazia.

La China absorbescha en la Mar sid- ed ost-chinaisa vasts territoris da pestga, da reservas da materia prima e cun vias per la navigaziun. Plinavant construescha la China implants militars sin inslas e grips. Plirs represchentants politics dals Stadis Unids han annunzià ch'ils Stadis Unids vegnian ad impedir la China d'acquistar territoris en las parts internaziunalas da la Mar sid-chinaisa.

Sco privel serius vesan Mattis ed Inada il program atomar e da rachetas da la Corea dal nord. Per finir ils dus dis discurs èn Mattis ed Inada sa cunvegnids da rinforzar l'allianza tranter ils dus pajais.

RR novitads 08:00