Siglir tar il cuntegn

Header

Navigaziun

Purtret da Schimon Peres en ner ed alv.
Legenda: L'anteriur president da l'Israel è mort cun 93 onns. Reuters
cuntegn

Exteriur Schimon Peres è mort

Duas emnas è Schimon Peres stà en ospital perquai ch'el ha gì in culp dal tscharvè. Uss è il purtader dal Premi Nobel da pasch mort.

Malgrà ses 93 onns è Schimon Peres s’engaschà senza paus per la pasch. Per la pasch tranter Israelians e Palestinais. Tranter auter cun sia organisaziun «Peres Center for Peace». Ses siemi era d'avair dus stadis. In stadi gidieu cun num Israel en pasch sper in stadi arab cun num Palestina.

Igl onn 1994 era Peres vegnì undrà cul Premi Nobel per la pasch. Quel veva el survegnì ensemen cun l'anteriur schef da regenza israelian Jizak Rabin ed l'anteriur manader dils Palestinais, Jassir Arafat.

Ils emprims onns da sia carriera politica ha Peres dentant represchentà ina lingia dira vers ils Palestinais. Ultra da quai vala el sco bab dal program atomar israelian. In program secret enfin oz.

Ils onns 80 e 90 era Schimon Peres stà duas giadas schef da regenza. Dil 2007 tochen il 2014 president da stadi digl Israel. Er en questa posiziun plitost formala è el adina s'engaschà femamain per la pasch tranter Israel e Palestina.

Gronda tristezza tar blers schefs da stadi

Il primminister israelian Benjamin Netanjahu ha reagì cun gronda tristezza sin la mort da Peres e condolà a la famiglia en malencurada. Tut la populaziun israeliana haja charezzà Schimon Peres.

Il president dals Stadis Unids Barack Obama ha undrà Schimon Peres sco «cumbattant per l'Israel» e per il Proxim Orient. Ultra da quai ha communitgà Obama che nagin auter haja fatg tant sco Peres per bajegiar l'allianza tranter l'Israel ed ils Stadis Unids da l'America, Ina allianza che saja ozendi ferma sco mai.

Joachim Gauck il pesident da la Germania ha undrà Schimon Peres per ses enorm engaschi per la pasch. A la Germania vegnia cunzunt era a restar en memoria sia prontadad da sa reconciliar suenter ils crims dal holocaust.

RR novitads 06:00