Siglir tar il cuntegn

Exteriur Schender da Trump sut la marella dal FBI

Jared Kuschner, il schender dal president american, Donald Trump e ses pli stretg cussegliader è vegnì en il focus pervi da las investigaziuns davart contacts dispitaivels cun la Russia. Quai scrivan las gasettas Washington Post e NBC News. Els sa refereschan sin persunas da la regenza.

Purtret da Trump e Kuschner che sesan in dasper l'auter.
Legenda: Il president american, Donald Trump e ses schender, Jared Kuschner dasper el. Keystone

Las investigaziuns cunter Kushner giajan da quai ora ch'el haja infurmaziuns relevantas. Las investigaziuns na muntian dentant betg che Kushner vegnia accusà d'esser in criminal u ch'el vegnia cità avant dretgira. I saja dentant n'er betg cler sche l'FBI haja gia contactà Kushner.

La Washington Post aveva gia l'emna passada rapportà ch'ina persuna che stettia datiers da Trump haja sveglià l'interess dals investigaders. Ussa scriva la gasetta ch'i s'interesseschian sur tut per intginas s'entupadas da Kushner cun l'ambassadur russ e cun in banchier da Moscau.

Um pussant davos las culissas

Jared Kushner è maridà cun Ivanka Trump, la figlia dal president. En la Chasa alva saja Kushner in um fitg pussant davos las culissas. El è tranter auter incumbensà cun il process da pasch en il Proxim Orient, las relaziuns cun la China, ina refurma dal dretg penal ed ina renovaziun da la regenza.

Svilup malempernaivel

Per Trump è quest svilup probablamain malempernaivel. Trump è il mument sin viadi en l'exteriur. El stat il mument davant ses emprim inscunter suprem dals G7. Ch'el pudess esser involvì cun la Russia engrevgescha gia dapi l'entschatta sia perioda d'uffizi.

Tenor resultats dad investigaziuns haja Moscau empruvà d'influenzar activamain las elecziuns a favur da Trump. En las investigaziuns dal FBI e quellas dal congress vai principalmain per la dumonda sch'i haja dà cunvegnas tranter commembers dal team d'elecziun da Trump e Moscau. Il ministeri da giustia ha l'emna passada mess en in investigader spezial che duai manar las investigaziuns dal FBI.

RR novitads 06:00