Siglir tar il cuntegn

Header

Navigaziun

Il schef da la Volkswagen Gruop of America, Michael Horn.
Legenda: Il schef da la Volkswagen Gruop of America, Michael Horn. Keystone
cuntegn

Exteriur Schef da VW America sto sa responsar avant cumissiun parlamentara

Il scandal da valurs da svapur manipuladas da l’interpresa d’autos tudestga VW ha uss consequenzas per il schef da VW en ils Stadis Unids, Michael Horn. El sto sa responsar avant ina cumissiun da la chasa dals represchentants.

Tenor in pledader è Horn vegnì cità ils 8 d’october avant il gremi. Medemamain èn represchentants da l’uffizi d’ambient american vegnids ordinads avant la cumissiun.

L’interpresa da VW ha communitgà che 80’000 autos èn pertutgads sulet en l’Irlanda. Malgrà il scandal, ha VW vendì dapli autos il mais da settember en ils Stadis Unids en cumparegliaziun cun il medem temp avant in onn.

Era BMW sut la marella

En connex cun il scandal da svapur vulan las autoritads da l'ambient americanas entant era prender sut la marella autos dal producent BMW. Il concern saja infurmà davart ils plans, ha confermà in pledader da BMW envers la «Financial Times».

Ins sustegnia quai en il senn da transparenza e per mantegnair la confidenza. Il concern na spetgia però naginas surpraisas negativas.

Suenter ch'ils Stadis Unids avevan scuvert il scandal da VW avant duas emnas aveva BMW adina puspè punctuà da betg avair fatg talas manipulaziuns.

RR novitads 09:00/14:00