Exteriur - Scandal da svapur: VW mida structura da fatschenta
Il concern d'autos VW mida sia structura da fatschenta sco consequenza dal scandal da svapur. Collavuraturs che lavuran en centralas da svilup da motors duain midar pli savens lur posiziun.
I saja planisà in principi da rotaziun per singulas funcziuns, ha ditg il nov parsura dal cussegl da surveglianza, Hans Dieter Pötsch a la gasetta «Welt am Sonntag». Cun questa mesira vul VW impedir ch'i dettia structuras pauc flexiblas che possian esser la basa per acziuns illegalas.
