Siglir tar il cuntegn

Exteriur Sarkozy sto avant dretgira

L'anteriur president franzos Nicolas Sarkozy sto ir avant dretgira. Al politicher vegn tranter auter renfatschà corrupziun. Quai rapporta l'agentura da novitads AFP.

Sarkozy va sur in plaz e na vesa betg ora cuntent.
Legenda: Sarkozy sto ir avant dretgira. Keystone

Sarkozy duai avair empruvà da corrumper il 2014 in procuratur public dal tribunal suprem. Quai per survegnir invista en las actas d'inquisiziun davart la finanziaziun da ses cumbat electoral il 2007. Dapi in'emna vegn l'anteriur president suspectà uffizialmain d'avair finanzià illegalmain ses cumbat electoral.

Segunda investigaziun cunter Sarkozy

Igl è gia la segunda giada ch'i dat investigaziun cunter Sarkozy: El sto er ir avant dretgira pervi d'expensas illegitimas durant il cumbat electoral dal 2012. Las investigaziuns davart il supponì sustegn finanzial ord da Libia han cumenzà il 2013.

Sarkozy è stà president da la Frantscha dal 2007 fin il 2012.

RR novitads 18:00