Sancziuns cunter la Russia restan ad interim

L'Uniun europeica n'è betg cuntenta cun il svilup en l'Ucraina e prolunghescha perquai las sancziuns cunter la Russia.

bandiera Russa in pau turbla pervi dals nivels

Legenda da maletgs: Temp turbel per la Russia cuntinuescha Reuters

Il process da pasch per l'Ucraina na fetschia betg avunda progress. Perquai valian las sancziuns er per ils proxims 6 mais. Quai han ils represchentants da 28 stadis da l'UE decidì. Ussa ston las regenzas en las citads principalas anc confermar questa decisiun a scrit. Las sancziuns sa drizzan tranter auter cunter bancas statalas Russas, cunter l'import e l'export da material d'armament e cunter l'industria da gas ed ieli Russa.

Il fanadur 2014 aveva l'UE decidì questas sancziuns suenter ch'in aviun da passagiers era vegnì sajettà giu sur l'Ucraina. 298 persunas eran a bord. La UE aveva gia prolungà las sancziuns enfin il schaner 2016, e quai, malgrà las perditas per interpresas indigenas. L'entschatta december avess l'UE puspè giu da decider davart ina prolungaziun. Plirs pajais avevan dentant annunzià dubis perquai ch'ins na possia betg chastiar la Russia ed il medem mument prender encunter agid en il conflict da la Siria.