Las sancziuns cunter l'Iran na vegnan dentant betg schliadas immediat tar in gea a la resoluziun. L’agentura internaziunala per l’energia nucleara IAEA sto l'emprim anc confermar che l’Iran sa tegnia vi da la cunvegna. Con ditg che quai process dura, n'è anc betg enconuschent.
Schliadas vegnan cun quella resoluziun dentant be las sancziuns ch’ils 193 commembers da l’ONU avevan decidì cunter Iran. Las sancziuns da l’Uniun europeica, dals Stadis Unids da l’America e d’ulteriurs pajas restan anc.
Congress american ha 60 dis temp
Il text per la cunvegna d’atom cun l’Iran ha la regenza dals Stadis Unids da l’America uss surdà al congress american. Il congress ha 60 dis temp d’examinar la cunvegna, ha communitgà in pledader dals affars da l’exteriur dals Stadis Unids. Surtut da vart dals republicans hai gia dà critica envers la cunvegna d’atom. Ma era plirs represchentants da la partida democrata èn sa mussads critics.
Il president Barack Obama ha gia annunzià da duvrar ses veto sch’il congress avess da refusar la cunvegna.