Il minister da l'intern da l'Italia Matteo salvini resta tar sia lingia rigurusa envers fugitivs. El vegnia er vinavant ad impedir che bastiments dad organisaziuns nunguvernamentalas NGO possian arrivar en ports talians. Quai ha Salvini communitgà la sonda sin Facebook. L'Italia na veglia betg pli esser il cumplizi da l'affar cun la migraziun illegala.
Tant l'Italia sco er la Malta avevan snegà avant paucs dis al bastiment d'ina NGO «Aquarius» da vegnir en lur ports. Avant in'emna aveva SOS Mediterranée prendì si tar diversas acziuns da salvament ils 629 migrants. Il bastiment «Aquarius» è entant sin via vers Valencia en la Spagna, nua ch'el duess arrivar dumengia. Dus ulteriurs bastiments da NGO èn per il mument staziunads avant la costa da la Libia.
RR novitads 10:00