Siglir tar il cuntegn
Inhalt

Exteriur Sajettim sin policists israelians al Munt dal Tempel

Suenter in’attatga cun armas da fieu en la citad veglia da Jerusalem ha la polizia israeliana serrà la zona enturn il Munt dal Tempel ed annullà l’uraziun dal venderdi muslima.

Trais umens mettan ina purtantina cun in corp en in auto.
Legenda: Il corp dad in dals attatgaders vegn purtà davent. Keystone

Trais umens hajan sajettà sin ina gruppa da policists en vischinanza dal Munt dal Tempel, ha communitgà la polizia. Sin quai hajan ils policists sajettà enavos. Tar la sajettada sajan trais policists sa blessads. Ils trais attatgaders sajan vegnids sajettads giu.

Dapi l’entschatta da l’unda da violenza avant stgars dus onns èn morts var 300 Palestinais e passa 40 Israelians tar attatgas sumegliantas.

Il motiv per l’onda da violenza è ina dispita davart ils dretgs d’utilisaziun dal Munt dal Tempel a Jerusalem, che è sontg per Muslims e Gidieus. La violenza vegn però era sustegnida da la frustraziun dals Palestinais davart l’occupaziun israeliana.

RR novitads 9:00