Siglir tar il cuntegn

Exteriur Sajettà giu aviun russ: Putin smanatscha a la Tirchia

Suenter che l'aviatica militara tirca ha sajettà giu in aviun da cumbat russ al cunfin cun la Siria, smanatscha il president russ Wladimir Putin a la Tirchia.

Il president russ, Wladimir Putin.
Legenda: Il president russ, Wladimir Putin. Keystone

La crudada da l'aviun haja grevas consequenzas per las relaziuns tranter ils dus pajais, ha Putin ditg en la televisiun russa. Lur aviun na saja mai stà in privel per la Tirchia.

Entant ha la Russia avertì da far vacanzas en Tirchia. En Tirchia na saja il privel da terrur betg pli pitschen che en l'Egipta, ha ditg il minister da l'exteriur russ Sergej Lawrow.

Avertì ils pilots 10 giadas

Tenor il militar tirc è l’aviun da cumbat russ penetrà en il spazi d'aria tirc. 10 giadas aifer 5 minutas hajan ins avertì ils pilots ch'els penetreschian en il spazi d'aria tirc. Pir suenter hajan ins sajettà.

Il minister da l’exteriur russ cuntradi dentant a quellas explicaziuns da la Tirchia. L’aviun da cumbat russ saja adina sgulà en il spazi d’aria da la Siria. Ils dus pilots hajan duvrà il sez catapultabel. Co i giaja ad els, na sappian ins betg. Tenor ina gruppaziuns da rebels da la Siria hajan ins chattà in dals dus pilots russ: el saja mort.

Sesida extraordinaria da la NATO

L’attatga da la Tirchia sin in aviun da cumbat russ ha consequenzas. Il mument tegnan ils ambassadurs dals pajais da la NATO in inscunter extraordinari a Brüssel. La sentupada è vegnida organisada sin giavisch da la Tirchia.

RR novitads 11:00/14:00