Siglir tar il cuntegn
cuntegn

Exteriur Russia vul 50 plazzas pli pauc tar l'ambassada britannica

La regenza russa ha concretisà sias sancziuns diplomaticas cunter la Gronda Britannia: L'ambassada britannica en Russia sto reducir ses persunal per 50 persunas.

  • La Russia vul stritgar 50 plazzas tar l'ambassada britannica en la Russia. Pertutgads èn diplomats e persunal tecnic.
  • Uschia veglian ins realisar egualitad. La Gronda Britannia aveva en connex cun il cas da Sergej Skripal numnadamain era reducì il dumber da diplomats russ.

La replica da la Russia envers la Gronda Britannia: l'ambassada britannica en la Russia duai esser represchentada da tant persunal sco l'ambassada russa en la Gronda Britannia. Cun questa mesira veglian ins realisar egualitad ha ditg la pledadra. Cun questa mesira veglian ins realisar egualitad ha ditg la pledadra.

Concret vul quai dir che 50 plazzas vegnan stritgadas. Pertutgads sajan diplomats e persunal tecnic. La reducziun sto succeder entaifer in mais.

Dumber da persunal

Per il mument dumbra l'ambassada britannica en Russia radund 60 diplomats accreditads, da quels èn 23 però gia vegnids bandegiads.

Dasperas datti er anc persunal tecnic accredità. Quai èn responsabels pers segirtads, tecnicists u er scolasts tar scolas da l'ambassada.

Questa decisiun è la replica per la bandegiada da diplomats che la Gronda Britannia aveva proclamà en connex cun l'attatga da tissi sin l'anteriur spiun Sergej Skripal e sia figlia.

RR novitads 14:00