Siglir tar il cuntegn
Inhalt

Exteriur Rumenia: Ulteriur minister sa retira pervi dals protests

Sin squitsch dals protests massivs sin las vias rumenas e sin quel dal primminister Sorin Grindeanu è sa retratg il minister da giustia Florin Iordache. Iordache ha annunzià ses pass ad ina conferenza da medias a Bukarest.

totala cun fitg blers demonstrants sin las vias da Bukarest.
Legenda: Millis da persunas protesteschan dapi intginas emnas cunter l’ordinaziun che schluccass las leschas cunter la corrupziun. Keystone

Primminister Grindeanu ha rinfatschà a Iordache dad avair disditg tar la communicaziun publica davart l’ordinaziun dispitaivla a reguard maldiever da l’uffizi. Iordache ha communitgà quai ad ina conferenza da medias a Bukarest.

portrait dad el.
Legenda: Il minister giustia Florin Iordache durant sia conferenza da medias a Bukarest. Keystone

Maldiever da l'uffizi mo a partir dad in donn da 200'000 lei ensi

La regenza ha abolì entant quest’ordinaziun pervi dals protests massivs sin las vias. L’ordinaziun avess schluccà las reglas da corrupziun per impiegads dal stadi. Quai fiss succedì cun fixar, che maldiever da l’uffizi sappia mo anc vegnir persequità, sche la summa da donn è almain tar 200’000 lei – tge che correspunda a 45’000 euros.

Ella avess favurisà il manader dals socialdemocrats (PSD), Liviu Dragnea, che stat avant dretgira pervi da maldiever d’uffizi cun in donn da 100’000 lei.

Pervi dals protests era gia sa retratg il minister da commerzi rumen.

Novitads 17:00