Roma, Paris e Washington sa preparan per attatgas

En consequenza da l’attatga da Berlin rinforzan blers pajais lur mesiras da segirezza durant ils da festa. Uschia èsi scumandà per camiuns da charrar tras il center da Roma. Quai ha communitgà la presidenta da la citad. Er la Frantscha ed ils Stadis Unids sa preparan per eventualitads.

En la citad da Roma vegnan durant ils dis da festa ad esser preschents damain camiuns.

Legenda da maletgs: En la citad da Roma vegnan durant ils dis da festa ad esser preschents damain camiuns. Reuters

La Frantscha intensivescha sias controllas als cunfins cun la Germania, il Luxemburg e la Svizra. Las forzas da segirezza sajan cumplainamain mobilisadas per il cumbat cunter il terrorissem, ha ditg il minister da l’intern, Bruno Le Roux. L'onn 2016 sajan vegnidas impedidas 17 attatgas da terror potenzialas.

Er la polizia federala dals Stadis Unids FBI avertescha dal privel d’attatgas terroristicas sin baselgias u occurrenzas durant ils dis da festa: Sin paginas d'internet che simpatiseschan cun il SI saja vegnida publitgada ina glista cun baselgias en ils Stadis Unids. Tenor las autoritads na dettia quai dentant nagins indizis per privels specifics.

Scumond da camiuns a Roma

La presidenta da la citad da Roma Virginia Raggi ha decretà in scumond da charrar per camiuns en la chapitala. Las mesiras valan dals 24 fin ils 26 da december sco era dals 31 da december fin ils 6 da schaner. Exceptads èn vehichels sut 3,5 tonnas che transportan bains impurtants sco mangiativas, medischina u posta.

Ord motivs da segirezza aveva Raggi gia la gievgia annunzià in scumond da fieus artifizials.

RR novitads 06:00