Siglir tar il cuntegn
Inhalt

Exteriur «Rock am Ring» tuna puspè – Suspect da terror betg cumprovà

Il festival da musica «Rock am Ring» en la Germania po cuntinuar. Pervi d'in pussaivel privel da terror avevan l'organisatur e la polizia decidì venderdi saira d'interrumper il festival.

massa da glieud che banduna festival
Legenda: Venderdi saira avevan ils visitaders dal «Rock am Ring» stuì bandunar l'areal suenter in avertiment da terror al Nürburgring. Keystone

Sco quai che la polizia da Koblenz communitgescha sin Twitter, sa legra ella ch'il festival possia continuar. Las trais persunas che la polizia aveva arrestà venderdi saira pervi da suspect da terror sajan puspè libers, communitgescha la polizia.

Suspect da terror n'è betg sa cumprovà

Suenter perquisiziuns intensivas da l'entir areal dal festival, n'ha la polizia chattà nagut che sustegnia il suspect ch'i pudessia dar in attentat. Uschia na dettia quai nagin privel acut, communitgeschan ils organisaturs dal festival sin facebook.

Il suspect da terror era sa dà, cura ch'ils organisaturs han constatà ch'il num sin ina carta da persunal n'avevia betg correspundì al num registrà en il sistem. Tar ina da questas persunas haja la polizia gì indizis per colliaziuns cun la scenza da terror islamistica. Las investigaziuns continueschian.

En ina tala situaziun na dastgain nus prender nagins ristgs.
Autur: Roger Lewentzminister da l'intern (SPD), Rheinland-Pfalz

Ins na veglia prender nagins ristgs, uschia la regenza da Rheinland-Pfalz, remartgond ch'i haja dà sumegliantas interrupziuns preventivas d'eveniments, sco per exempel tar in gieu da ballape a Hannover (november 2015). Era il minister da l'intern da la Germania, Thomas de Maizière (CDU) ha sustegnì la decisiun da Rheinland-Pfalz. La segirtad dals visitaders dal festival saja la pli emprima prioritad.

Organisaturs impressiunads dal public

Radund 86'000 visitaders han bandunà paschaivel l'areal dal festival – quai aifer in quart d'ura. Da l'evacuaziun nunproblematica e paschaivla èn ils organisaturs sa mussads impressiunads. «Uschia avain nus era dà in signal per nossa cultura», ha ditg l'organisatur Marek Lieberberg. Sch'ils concerts ch'èn crudads venderdi saira vegnan anc ad avair lieu durant il festival, vegn anc sclerì.

RR novitads 11:00