Il frar giuven dal president american Donald Trump – Robert Trump – è mort. El saja mort paschaivlamain, ha declerà il president. Donald Trump è gia il venderdi sa mussà preoccupà davart il stadi da sanadad da ses frar da 71 onns e ch'era en l'ospital. Robert Trump fiss vegnì ils 26 d'avust 72 onns. Detagls davart la malsogna da Robert Trump n'aveva la Chasa alva però betg communitgà.
El n'era betg be mes frar, el era mes meglier ami. El vegn a mancar fitg, nus vegnin dentant a sa vesair.
La relaziun tranter Trump e ses frar valeva sco fitg buna. Robert Trump è pli baud stà il manager da la gruppa d'interpresas da ses frar. Da curt aveva el fatg naufragi avant dretgira cun ina dumonda da scumandar che sia nezza Mary publitgeschia in cudesch davart la famiglia Trump. Mary è la sora dal frar vegl Fred, ch'è mort l'onn 1981 en la vegliadetgna da 43 onns.