Il ghitarrist da Status-Quo è mort sonda, ils 24 da december 2016, enturn mezdi per consequenza d'ina infecziun. Suenter ch'el era crudà sin ina spatla ed aveva stuì laschar operar quella è el stà en l'ospital dapi gievgia saira.
La communicaziun sin Facebook ha ditg che Parfitt eria il mument en ina fasa da sia vita ch'el sa legrava sin novas sfidas. Sco i para aveva el planisà ina carriera solo ed in'autobiografia per l'onn 2017.
Rick Parfitt lascha enavos sia dunna Lyndsay, dus uffants creschids e dus en la vegliadetgna dad otg onns.
Ina lunga carriera da musica
Naschì è Parfitt a Woking en il sid da Londra. Cun indesch onns ha el emprendì da sunar ghitarra, inspirà dal «King of Skiffle» Lonnie Donegan. Ses geniturs han sustegnì el, dentant mai cartì en il success.
L'onn 1967 ha el lura cumenzà tar Status Quo. L'entschatta dals onns 70 han els gì ils emprims success cun hits da rock sco «Paper Plane» ni «Caroline». Suenter quests success tutgavan els tar ils pli enconuschents musicists. Cun melodias simplas e trais accords. Experiments n'hajan els betg fatg blers. Lur recept era simpel ma ha vendì cun hits sco «Rockin' All Over The World» ed «In The Army Now» dapli che 120 milliuns plattas.
Tragedias en sia vita privata
L'emprima maridaglia è ida a la malura perquai che sia feglia Heidi è najada cun dus onns en il pool da sia chasa a Surrey.
La vita è ida vinavant ed ins ha emprendì da viver cun quai, ma ins na vegn mai sur quai or. Mai.
Suenter è el maridà cun Patti Beedon. Quai n'ha dentant er betg funcziunà bain. Parfitt era adina sin turnea ed è adina stà u sturn u sut l'influenza da cocain. Cun sia terza dunna, Lyndsay Whitburn ha el sco ultim vivì a Màlaga en Spagna. Els han gì schumellins ensemen.
Stil da vita excessiv
Ses stil da vita excessiv ha dentant mussà consequenzas. L'onn 1997 ha el survivì sia emprima attatga dal cor. Suenter ha el survegnì cancer en il nuf da la giargiatta e duas ulteriuras attatgas dal cor. Il quart ha el lura gì il zercladur 2016 suenter in concert en la Tirchia. Parfitt saja quasi stà mort per tschintg minutas. L'october 2016 aveva el perquai communitgà ch'el na passia betg pli si cun la band.
Malgrà tut las tragedias saja Parfitt stà cuntent
Era sche Parfitt ha gì blers schocs en sia vita ha el ina giada ditg ad ina gasetta ch'el sa sentia fitg bain en sia pel, suenter ch'el haja puspè dumagnà da vegnir sin la dretga via.
RR novitads 17:00
