Sch’ils Stadis Unids retiran 9’500 schuldads, restan anc radund 25’000 staziunads en la Germania. Quests plans han il minister da defensiun Mark Esper ed il schef dal stab general discutà il glindesdi cun il president. In urari per retrair la schuldada n’han ins anc betg numnà.
Il ministeri da defensiun vegnia ad infurmar las proximas emnas il congress american, e silsuenter lura er ils partenaris da la Nato, ha declerà in pledader dal ministeri. Il parlament pudess dentant anc bloccar u almain engrevgiar la retratga da schuldada, giavischà da Donald Trump. Quai cun decisiuns en il rom dal preventiv da l’armada.
Resistenza en il parlament
En il congress hai divers adversaris da la retratga parziala, tant tar ils republicans da Trump sco era tar ils democrats. Critica pervi dals plans datti cunzunt, perquai che la retratga pudess flaivlentar la Nato e gidar la Russia da survegnir dapli influenza.
Donald Trump giavischa da retrair schuldada da la Germania – perquai ch’el è da l’avis ch’il pajais investeschia memia pauc en si’armada.
Impurtant per armada americana
Intgins dals lieus en la Germania cun truppas americanas, èn da fitg gronda impurtanza per l'armada americana. Da la basa aviatica Ramstein anora transportan ils Stadis Unids truppas e refurniment en regiuns d'acziun en il Proxim Orient ed en l'Africa.
Vitiers sa chatta a Landstuhl il pli grond lazaret american ordaifer ils Stadis Unids. A Grafenwöhr en la Bavaria è ina da las pli grondas plazzas da l'exercizi da truppa. E davent da Stuttgart dirigia l'armada americana sias truppas en l'Europa ed en l'Africa.
