Siglir tar il cuntegn

Exteriur Retg da la Svezia mida statuts per gremi dal Premi Nobel

Il retg da la Svezia mida suenter plirs tschients onns ils status per il gremi dal Premi Nobel da litteratura. Las midadas stattan en connex cun in scandal.

Carl XVI. Gustaf.
Legenda: La midada da statuts duai pussibilitar als commembers da bandunar il gremi. Keystone

Suenter il scandal en connex cun la giuria dal Premi Nobel da litteratura en la Svezia, mida il retg Carl XVI. Gustaf uss ils statuts per il gremi. Fin uss n’eri betg pussaivel da demissiunar da la giuria dal Premi Nobel. Ils posts vegnivan surdads per vita duranta. Uschia n'avess ins betg pudì remplazzar ils posts da la giuria da commembers ch'avevan communitgà da betg pli vulair sa participar a sesidas per motivs da protests.

Quests protests stattan en connex cun ina affera da corrupziun e tradiment da secrets.

Midadas dals statuts – midadas en il gremi

Cun la midada dals statuts duai esser pussaivel d'occupar da nov quests sezs. Dentant na duain betg mo ils sezs dals commembers che vulan sa retrair per protest vegnir occupads danovamain, mabain er da quels commembers che n'han ils davos dus onns betg lavurà activamain en il gremi.

RR novitads 20:00