Resoluziun d'Armenia: Tirchia vul vinavant relaziun cun Germania

Il schef da la regenza tirca Binali Yildirim na vul betg interrumper dal tuttafatg las relaziuns cun la Germania suenter ch'il Bundestag ha approvà la gievgia la resoluziun da l'Armenia. La Tirchia aveva immediat reagì cun clamar enavos ses ambassadur da Berlin.

Yildirim.

Legenda da maletgs: Yildirim: «La Germania e la Tirchia èn impurtants partenaris d'allianza.» Keystone

La Tirchia e la Germania sajan fitg impurtants partenaris d'allianza, ha ditg Yildirim. Quai na muntia però betg che la Tirchia na vegnia betg a reagir sin la resoluziun.

La Tirchia snega anc adina ils schabetgs dal genocid istoric d’Armens d’avant passa 100 onns. La Germania ha renconuschì las atrocitads che l’Imperi osmanic aveva commess en la Namibia d’ozendi. Istorichers quintan che tranter 800'000 e 1,5 milliuns persunas sajan daventadas unfrendas dal genocid.

La debatta en il Bundestag a Berlin è vegnida persequitada d'Armens e da spirituals armens.

Legenda da maletgs: La debatta en il Bundestag a Berlin è vegnida persequitada d'Armens e da spirituals armens. Reuters

Resoluziun dispitaivla

La resoluziun è stada dispitaivla, ma è vegnida approvada cleramain cun ina cuntravusch ed in'abstenziun, ha communitgà il president dal Bundestag, Norbert Lammert. La resoluziun era vegnida instradada da las partidas CDU, SPD e dals Verds.

Tirchia ha reagì immediat

Ch'il Bundestag ha renconuschì il genocid als Armens vegn ad avair consequenzas seriusas per la relaziun dals dus pajais, quai ha ditg il president tirc, Recep Tayyip Erdogan. Sco emprim pass aveva la Tirchia clamà enavos ses ambassadur a Berlin. Vitiers aveva la regenza tirca cità l'ambassadur tudestg en il ministeri da l'exteriur ad Ankara.

Atrocitads: Armens mazzads da l'Imperi osmanic en la citad siriana Aleppo l'onn 1915.

Legenda da maletgs: Atrocitads: Armens mazzads da l'Imperi osmanic en la citad siriana Aleppo l'onn 1915. Keystone

Herero: Er Germania vul rugar per perdun

La Germania sezza aveva lung temp snegà da valitar la suppressiun da la revolta dal pievel da Herero en la Namibia avant passa 100 onns sco genocid. Millis persunas eran lura vegnidas chatschadas en champs che purtavan gia lura la l’expressiun ‘champ da concentraziun’.

Tenor indicaziuns dal Museum istoric tudestg han in fin dus terzs da tuts Hereros pers lur vita. L’impuls era stada ina revolta sanguinusa cunter ils patruns colonials tudestgs.

Fin la fin dal 2016 duai quai dar ina decleraziun da reconciliaziun communabla da la Germania e la Namibia. En questa decleraziun vul Berlin dumandar la Namibia per perdun. Igl è però anc nuncler sch’i vegn a dar in’indemnisaziun.

RR novitads 14:00 / 03.06.2016 - 12:00