Las autoritads svizras avevan refusà d'entrar en la dumonda d'asil d'ina famiglia da l'Irac perquai che lezza aveva l'emprim inoltrà la dumonda en la Germania.Cunter questa decisiun ha la famiglia iracaisa fatg recurs. Il Tribunal administrativ federal vegn a la conclusiun ch'in recurs en Svizra saja legal.
En l'avegnir pon requirents d'asil far en general recurs sch'els èn da l'opiniun che la Svizra haja surdà lur cas a moda malgista ad in auter stadi. Sin fundament da questa decisiun dal Tribunal administrativ federal survegnan requirents d'asil dapli protecziun giuridica.
Manchentà termin
Suenter che la famiglia ha inoltrà la dumonda d'asil avess la Svizra stuì entaifer trais mais inoltrar a las autoritads da la Germania ina dumonda per surpigliar la dumonda d'asil. Quest termin ha la Svizra manchentà, sco la famiglia ha fatg da valair avant dretgira.
Era sche la Germania ha entant surpiglià il cas, sto la Svizra examinar sezza sia dumonda d’asil. Quai decida il Tribunal administrativ federal, e mida sia pratica en vista ad ina decisiun dal Tribunal europeic.
RR novitads 14:00