Il schef da la regenza austriaca mainia dapi emnas ina campagna da manzegnas encunter l'Ungaria, uschia il minister d'exteriur da l'Ungaria, Péter Szijjártó. E quai malgrà ch'il pajais sa tegnia vi da tut las reglas da l'Uniun europeica ed emprova da chattar ina schliaziun effizienta da cuminanza en la crisa da fugitivs.
Regurdientschas vi dal temps dals nazis
Il chancelier austriac Werner Faymann aveva crititgà l'Ungaria pervia da ses agir cun ils fugitivs. En la gasetta tudestga «Der Spiegel» aveva el manegià: «Da metter fugitivs en in tren e laschar crair els d'arrivar tut en in auter lieu, sveglia regurdientschas al pli stgir temp dal continent.»
I saja insupportabel «da sutdivider dretgs d’umans tenor relegiun». Il primminister ungarais, Viktor Orban fetschia sapientivamain «ina politica da starmentament.»
En l'Ungaria eran avant radund in'emna plirs tschient da fugitivs ids en in tren en direcziun da l'Austria. Suenter curt temp han las autoritads dentant franà il tren e transportà els en in champ da fugitivs.
Orban vul trametter enavos fugitivs
Ed il primminister ucranais, Victor Orban resta dirs en chaussa fugitivs. En l'avegnir vul el trametter enavos quels danunder ch'els èn vegnids. Ils migrants na vegnian numnadamain betg da territoris da guerra, mabain da champs da fugitivs nua ch'els erian gea en segirezza, uschia Orban envers la gasetta tudestga "Bild”. Blers vegnian en l'Europa sulet perquai ch'els tschertgian ina meglra vita.
Agid da milliardas per pajais pertutgads
Al proxim inscunter da l'Uniun europeica vegnia el perquai a preschentar in agen plan per schliar la crisa. Latiers tutgia in agid finanzial da milliardas per la Tirchia, il Libanon e la Jordania.
L'unda da fugitivs en l'Europa procura en mintga cas ch'ils budgets da tscherts stadis cumenzan a balluccar. Ils minister da finanzas da l'Uniun europeica pretendan perquai che la cumissiun da l'UE analiseschia las consequenzas finanzialas per ils stadis.
Els vulan tranter auter che las reglas da debits vertentas vegnan schluccadas. Tenor la cunvegna da Maastricht na dastga quest deficit betg esser pli grond che 3% da la prestaziun economica dal stadi.