Relaziun tranter l’Arabia Saudita e l’Iran en scalgias

L'Arabia Saudita ha decidì d'interrumper las relaziuns diplomaticas cun l'Iran.

L'ambassada saudita a Teheran brischa, davanttiers demonstrants iranais.

Legenda da maletgs: L’attatga sin l’ambassada saudita a Teheran engrevgescha la relaziun dals dus pajais. Reuters

La raschun è che demonstrants han assaglì l'ambassada da l'Arabia Saudita en la chapitala iranaisa Teheran, suenter ch'ils Saudis avevan executà il spiritual schiit Nimr Al-Nimr.

En ina emprima reacziun ha l'Iran reagì cun nun-chapientscha. Nagin diplomat n’haja patì donn. L'Iran saja per diplomats in dals pajais ils pli segirs en la regiun. L'execuziun dad Al-Nimr ha il ministeri da l'exteriur iranais taxà sco grond sbagl, che na possia betg vegnir zuppentà cun interrumper las relaziuns diplomaticas.

Entant alarmescha l'escalaziun las pussanzas mundialas

Suenter ils Stadis Unids pretendan era la China, la Russia, la Frantscha e la Germania da reglar la crisa subit cun mezs diplomatics. Il departement svizzer da l'exteriur ha cità il responsabel da l'ambassada saudita. Quai per exprimer che la Svizra saja en mintga cas cunter la paina da mort. En pli daventian las tensiuns confessiunalas - cun l'execuziun en massa - anc pli grondas, communitgeschan las autoritads federalas.

RR Novitads 06:00