En in pled davant demonstrants en la chapitala tirca Ancara ha il primminister Yildirim appellà da «gustar» ils 15 da fanadur sco firà.
Reintroducir paina da mort
Ultra da quai ha Yildirim danovamain menziunà che la Tirchia pudess puspè introducir la paina da mort. A las pretaisas da la massa demonstranta per la paina da mort ha Yildirim respundì: «Nus avain obtegnì voss messadi». Ils putschists vegnian «chastiads a moda la pli severa». La paina da mort en Tirchia era vegnida abolida l’onn 2004.
Sco il president Erdogan aveva gia pretendì avant ha era Yildirim appellà al pievel da vinavant sa radunar e da demonstrar cunter l’emprova da putsch.
Reacziuns europeicas: Stadi da dretg periclità
Differents politichers averteschan la Tirchia da reintroducir la paina da mort.
La Tirchia suprimiss las tractativas d’adesiun cun l’Uniun Europeica, ha ditg il minister da l’exteriur dal Luxemburg Jean Asselborn. E per il minister da l’exteriur austriac Sebastian Kurz fiss la reintroducziun da la paina da mort absolutamain inacceptabla. L’incumbensada per affars da l’exteriur da l’UE Federica Mogherini avertescha la Tirchia en general: da betg decider mesiras che pericliteschan il stadi da dretg.
Ulteriuras arrestaziuns
Suenter che l'emprova da derscher la regenza tirca ha fatg naufragi ha la polizia tirca arrestà ulteriurs schuldads, numnadamain quels ch'avessan gì da bloccar il president Recep Tayyip Erdogan en ses hotel da vacanzas. Ils 14 schuldads sajan vegnids arrestads en la citad da Marmaris.
En tut ha la regenza tirca fin ussa laschà arrestar radund 6’000 persunas. Ina part dal militar tirc aveva empruvà da derscher la regenza tirca la notg sin sonda.
RR novitads 06:00
