Siglir tar il cuntegn
Inhalt

Exteriur Recep Tayyip Erdogan empermetta paina da mort

Sch'el gudognia il referendum davart la refurma da la constituziun veglia el gulivar la via per reintroducir la paina da mort en la Tirchia. Erdogan ha appellà a ses aderents da far part en massa al referendum la dumengia da Pasca.

Placat da Recep Tayyip Erdogan che vul reintroducir la paina da mort en Tirchia.
Legenda: Recep Tayyip Erdogan vul reintroducir la paina da mort en Tirchia. Keystone

Sch'el gudognia il referendum davart la refurma da la constituziun vegnia el a preparar ina proxima votaziun dal pievel davart la paina da mort, ha Erdogan empermess ad Istanbul. Gia la stad passada aveva Erdogan menziunà per l'emprima giada da puspè vulair introducir la paina da mort, quai suenter ch'in putsch cunter el aveva fatg naufragi.

Dapli pussanza per Erdogan

La dumengia da Pasca decidan ils Tircs davart ina refurma da la constituziun. Quella duai dar marcantamain dapli pussanza al president. 55,3 milliuns votantas e votants èn clamads a l'urna en la Tirchia per decider davart il referendum. Ulteriurs 2,9 milliuns votants èn registrads en l'exteriur. Divers schurnalists persequiteschan la votaziun en Tirchia - per els è quai ina chaussa malsegira. Els pudessan vegnir arrestads.

RR novitads 17:00