Siglir tar il cuntegn
Inhalt

Exteriur Reactur atomar en Belgia deactivà

En la Belgia ha il gestiunari Electrabel deactivà la notg passada in reactur atomar ch'era vegnì mess en funcziun il glindesdi passà suenter ina pausa da bunamain dus onns. Electrabel ha confermà ch'ins haja chattà ina sfessa vi dal reactur «Doel 3» da l'ovra nucleara datiers d'Antwerpen.

Vista generala da l'ovra atomara Doel datiers d'Antwerpen.
Legenda: Ils reacturs Doel 1 e 2 èn il pli vegls en Belgia; els èn vegnids activads l'onn 1975. Keystone

Il gestiunari Electrabel ha chattà ina sfessa d’aua vi d’in generatur dal reactur «Doel 3». Quella sa chatta tenor indicaziuns en il sectur betg nuclear. Per reparar il donn è il reactur vegnì deactivà la notg da la gievgia sin il venderdi.

Reacturs manglus en Belgia ed en Svizra

Il reactur «Doel 3» è construì a medema moda sco l’ovra atomara Beznau en Svizra. A Beznau aveva l’Inspecturat federal da la segirezza nucleara ENSI chattà sbagls da material en 925 lieus. En ses rapport cumpareglia l’ENSI Beznau e Doel 3. A Doel èn vegnids chattads 12’000 lieus manglus. Il diameter da quests sbagls è en media dubel uschè grond sco quels a Beznau.

Reactivà reactur dispitaivel

La gievgia saira ha Electrabel reactivà il reactur Doel 2. La reavertura saja stada dal tuttafatg segira. L'inspecturat naziunal da la segirezza nucleara aveva pir curt avant lubì da prolungar la durada da l'implant fin il 2025. Oriundamain eri previs da metter quel ord funcziun cumplettamain. La dumengia saira vul il gestiunari lura metter en funcziun il reactur 1.

RR novitads 12:00