Siglir tar il cuntegn
cuntegn

Exteriur Razzias tar Cambridge Analytica

En connex cun il scandal da datas tar Facebook han l'autoritad da protecziun da datas britannica intercurì ils biros da Cambridge Analytica.

Cambridge Analytica.
Legenda: L'interpresa refusa las renfatschas. Keystone

18 collavuraturs da l'autoritad da protecziun da datas britannica ICO han intercurì il venderdi ils biros da la firma Cambridge Analytica. Quai era vegnì lubì da la dretgira.

Enconuschenta è l'interpresa sco firma ch'ha contribuì al success da Donald Trump tar sia candidatura sco president american il 2016. Uss vegn però renfatschà a Cambridge Analytica ch'ins haja vulì influenzar millis votants americans cun reclama betg lubida per Donald Trump. Gidà hajan datas da Facebook ch'ins haja acquistà a moda illegala. I sa tracta da datas da radund 50 milliuns utilisaders. Quai refusa Cambridge Analytica però. Il venderdi ha l'interpresa accusada communitgà dad era far examinaziuns internas.

Naginas datas svizras

Fin uss na dettia naginas indicaziuns che datas svizras sajan pertutgadas da l'abus da datas. Quai ha ditg l’incumbensà per la protecziun da datas e relaziuns publicas federal Adrian Lobsiger en la «Samstagsrundschau» da Radio SRF. L’abus da 50 milliuns datas da Facebook sa limiteschia als territoris anglofons.

Tema al inscunter suprem

La gievgia è l'inscunter suprem da l'Uniun europeica sa fatschentà cun il tema ed ha pretendì da Facebook da far dapli per la protecziun da datas da lur utilisaders.

Plinavant è vegnì pretendì ch'il schef da Facebook Marc Zuckerberg sclerescha las dumondas dals delegads.

RR novitads 07:00