Tar ina razzia dad antidoping en 33 pajais èn vegnidas arrestadas 234 persunas suspectadas. Tenor l'autoritad da polizia Europol èn 3,8 milliuns preparats da doping e medicaments falsifitgads sco er 24 tonnas steroids vegnids confiscads. En pli ha la polizia serrà nov labors secrets.
Acziun da polizia coordinada
L'acziun sut la direcziun da l'Italia e la Grezia è vegnida fatga durant il medem temp en 23 pajais da l'Uniun europeica e 10 ulteriurs pajais – tranter quels er la Svizra, ils Stadis Unids e la Columbia. Europol discurra da la pli gronda acziun dad antidoping da l'istorgia.
Dapli anabolica
Ils ultims 20 onns è il commerzi cun anabolica creschì enorm, declera Europol. Adina dapli sportits laics, bikers e bodybuilders cumprian ed empostian pitschens pachets cun steroids – quai surtut da l'Asia e l'Europa da l'ost. Pajà vegnia savens cun cartas da credit ch'ins possia chargiar si e cun valutas da krypto.
RR novitads 06:00